Sokasaltoan terminologiarekin

Zer da terminoa? Hitz tekniko bat, arlo eta jarduera jakin batekoa.

Esaterako, gaztelaniaz eta frantsesez hitz arruntak dira cuerda eta corde (hurrenez hurren); baina badira terminoak ere, adibidez hiru jakintza arlo hauetan erabiltzen direnak:

Musika	instrumentos de cuerda	instrument à cordes
Geometria	cuerda de una circunferencia	corde d´une circonference
Anatomia	cuerdas vocales	cordes vocales

Ingelesez, jakingo duzuenez, rope eta string dira sokari esateko hitz arruntak. Baina, kontuz!, goian aipatutako jakintza arloetan, zein berba erabiltzen dira?

Musika	stringed instruments   rope
Geometria	chord of a circumference   rope/string
Anatomia	vocal cords   rope/string/chord

Euskaraz, berriz, termino hauek erabili behar dira:   

Musika	hari instrumentuak / harizko musika tresnak   soka/korda
Geometria	zirkunferentzia bateko korda   soka/hari
Anatomia	ahots kordak   soka/hari

Kontsulta Zerbitzuko kide bat, veena jotzen errekreoan

Kontsulta Zerbitzura heltzen zaizkigun zalantza asko eta asko terminologiaren gainekoak izaten dira: Nola esaten da euskaraz...?

• Zona de cocción (Sukaldaritza) 

• Empoderamiento (Gizarte Zientziak) 

• Radiación de fondo de 3 K (Fisika)

Elhuyar eta Zehazki hiztegietara jotzen dugu aurrena, baina hiztegi horiek hitz arruntak kontsultatzeko erabili behar dira; dena dela, zenbait termino ere jasotzen dituzte (goian aipatu ditugun soka-hari-korda, adibidez). Gero, Euskalterm terminologia bankura jotzen dugu beti hitz teknikoak direnean (Mozilla Firefox nabigatzailerako Euskalbar tresna barran dituzue, beste hiztegi askorekin batera, bi hiztegiok eta Euskalterm bera; ez badaukazu oraindik, deskargatu segituan!).

Dena dela, tentuz ibili behar dugu Euskaltermekin, gure azken urteotako historia honetan proposatu diren aukera guzti-guztiak biltzen baititu, zaharkituta geratu direnak edo desegokiak direnak ere bai; Euskaltermen bertsio gaurkotuan, forma batzuek "termino normalizatua/gomendatua" etiketa dute, eta badirudi horiexek hobetsi beharko genituzkeela, eta beraz beldur gabe erabili.

Trebatu nahi duzue terminologian? Ea aurkitzen duzuen nola esan euskaraz: esquí de fondo (Kirola), fondo de pantalla (Informatika), fondo de inversión (Ekonomia), fondo de alcachofas (Sukaldaritza), radiación de fondo de 3 K (Fisika) eta fondo marino (Naturaren Zientziak).