Ez sartu!

Behar al du testurik irudi honek? Seguru asko, ez. Denok egingo dugu irakurketa bera, nork bere hizkuntzan: prohibit el pas, prohibido o paso, accès interdit, no entry, vietato l'ingresso, passagem proíbida... 

Eta euskaraz ?

Seinaletika eta errotulazio kontuak dira gaurkoak. Izan ere, denbora gutxian, arlo horretako bi kontsulta jaso ditugu: 

BAT: Nola eman euskaraz "Prohibida la entrada a toda persona ajena al servicio"?

Erantzuna hau izan zitekeen: Debekatuta sarrera zerbitzuari ez dagokion pertsonari (molde horretan egiten dira itzulpen asko, eta hala lortzen dugu elkar ez ulertzea).

Gure benetako erantzuna hemen dago. Artikulua osorik irakurtzeko gogorik ez baduzue, hona hemen funtsean zer diogun: Itzultzen dugunean, abiapuntuko testuaren esanahiari erreparatu behar diogu, eta ez formari. Beraz:

"Prohibida la entrada" = "Ez sartu"

"Prohibida la entrada a toda persona ajena al servicio" =

• "Ez sartu"
• "Zerbitzu honetako langilea izan ezean, ez sartu"
• "Zerbitzu honetako langileak izan ezik"

Gure bulegoan inor sartzerik nahi ez dugunean, kartel hau jartzen dugu. Badakigu Kieto beharko lukeela, baina...

BIgarren kontsulta: "Eskolako tailerren segurtasun-kartelak euskaratu ditugu Euskaltermen laguntzarekin, baina zalantzan gelditu gara kasu batzuetan. Kartel horiek tailerretan urteak emango dituztenez, ondo egin behar ditugu."

Oso itzulpen txukuna bidali zigutenez, zuzenketa gutxi egin genituen; elkarren artean, hau adostu genuen:

Uso obligatorio de ropa protectora	Segurtasuneko arropa nahitaez jantzi behar da
Uso obligatorio de protector	Babesa nahitaez erabili behar da
Es obligatorio usar careta de soldar	Soldatzeko aurpegi-babesa nahitaez erabili behar da
Es obligatorio usar calzado de seguridad	Segurtasuneko oinetakoak nahitaez erabili behar dira
Es obligatorio usar guantes	Eskularruak nahitaez erabili behar dira
Es obligatorio usar gafas protectoras	Begi-babesa nahitaez erabili behar da
Es obligatorio el uso de protección acústica	Belarri-babesa nahitaez erabili behar da
Es obligatorio enganchar las botellas	(Aire konprimituko) Botilak nahitaez lotu behar dira
Riesgo choque eléctrico	Kontuz!: Shock elektrikoa
Riesgo de atrapamiento	Kontuz!: Harrapatuta geratzeko arriskua
Peligro: materiales explosivos	Kontuz!: Lehergaiak
Atención: carga suspendida	Kontuz!: Karga zintzilik
Atención: superficies calientes	Kontuz!: Gainazal beroak
Emisión de partículas	Kontuz!: Karraka-hautsa eta txirbilak harrotzeko arriskua
Prohibido encender fuego	Ez egin surik
Prohibido fumar	Ez erre
Prohibido el paso a toda persona ajena a la obra	Ez sartu, obrakoa izan ezik
Rómpase en caso de incendio	Sua izanez gero, hautsi
Cuadro eléctrico	Elektrizitate-kutxa
Extintor	Su-itzalgailua
Salida de emergencia	Larrialdietako irteera

Konturatuko zinetenez, gaztelaniaz era batera baino gehiagotara esandakoak modu bakarrean eman ditugu euskaraz (beltzez markatu ditugu forma horiek guztiak); lehenago esan dugun bezala, esanahia hartu dugu kontuan. Funtzionatzen du? Zeuek esan!

Badakizue zeinek eman zigun lanik handiena? "Emisión de partículas" horrek. Hurrengo batean kontatuko dizuegu zer buruhauste izan genituen eta zergatik.